«الإنفلونسر مش شغلانة».. تفاصيل أزمة محمود الليثي و«البلوجر» مريم
كتبت: دنيا عبدالله
تصدر اسم الفنان محمود الليثي، و«البلوجر» مريم سيف إحدى مشاهير «السوشيال ميديا»، تريند جوجل، وذلك عقب أن نشب خلاف بينهما، خلال الساعات الماضية.
تفاصيل الأزمة
«الإنفلونسر مش شغلانة»، بهذه الكلمات بدأ الخلاف بين محمود الليثي والبلوجر، قرأت مريم منشور شاركه الليثي عبر حسابه الرسمي بموقع “إنستجرام” عقب عودة المواقع المتوقفة من جديد.
تعليق البلوجر على منشور “الليثي”
لترد البلوجر عليه في محاولة منها للتطاول عليه، وعلى ماضيه الذي تحدث عنه سابقا.
وقالت مريم: “معلش يا أستاذ محمود الفاضل وأنت كنت إيه لما طلعت واللي شهرك اليوتيوب وبعدها بقيت ممثل؟ .. وبعدين متنساش إن الممثلين دلوقتي لما بينطفوا مرة مبيرجعوش تاني”.
تابعت: “وأنت شغلانتك إيه؟ مش قدام الكاميرا زينا ولا إيه؟ ولو الكهربا قطعت بتنطفو أنتو كمان ولا إيه النظام؟ قالك أنفلونسر مش شغلانة ع الأقل احنا لينا نفع عنكم والله.. طب خلي ممثل كبير يتكلم طيب يا جدع مش كده.. أنا قولت محمود حميدة بيتكلم مثلًا اتخضيت لما لقيته محمود الليثي”.
واستطردت “الانفلونسر” مريم سيف في الرد على الفنان محمود الليثي في خاصية ستورى عبر حسابها على انستجرام قائلة: “نسي لما كان بيطلع يقول مكنتش بلاقي الـ 10 جنيه في جيبي وبركب رجلي علشان معيش حق المترو وغيره وغيره”.
وعلقت عليها قائلة : “بالظبط مش معنى إن ربنا كرمك تقلل من أي حد وتقول كده وأنت شغلانتك مش شغلانة ممكن تتوقف في أي لحظة، ما كل واحد يخليه في حاله أحلى له محدش ملاك قرف بجد”.
رد الليثي على تعليق الانفلوانسر
رد عليها الليثي ليضع حدًا لكلامها، قائلًا: “بصي يا أستاذة ياللي مش عارفك أولًا أنا مغلطش فيكي لشخصك وأنت غلطي فيا.. ثانيًا أنا ليا أصحاب كتير أنفلونسر وأشهر منك بمراحل أخدوا الموضوع بهزار عادي دا لأن فعلًا دي مش شغلانتهم الأساسية”.
اضاف الليثي: “ثالثًا لو أنت شايفة إن الممثل مش بينفع الناس وأنت بتنفعيهم فدا قلة فهم منك ودا مش هلومك عليه عشان دي حاجات مينفعش نشتريها.. بنتولد بيها”.
واستكمل: “رابعًا كونك تقول دا مكنش معاه 10 جنيه يركب مترو وتتريقي على دا.. فدا مصدر فخر ليا إني كنت أمل لشباب كتير إنهم يبدأوا من الصفر وينجحوا.. ورحلة كفاح انبسط إن الناس تعرفها”.
تابع: “خامسًا الفن دا مهنة زيه زي الطب والهندسة ولو حضرتك بتقرأي في التاريخ هتعرفي إنه موجود من يوم ما اتوجدت الحضارة وغير شعوب، عمل ثورات مش مرتبط بالكهرباء زي ما بتقولي”.
واختتم محمود الليثي حديثة : “وأخيرًا لو الأستاذ محمود حميدة شاف كلامك دا كان هيخليكي تعتذري للفن والفنانين كلهم اللي بتقللي من دورهم وكان هيفهمك ازاي تتكلمي بأسلوب راقي عن كدا”.
من هي مريم سيف
مريم سيف هي فتاة تعمل بلوجر عبر مواقع التواصل الاجتماعي، تقوم بالدعايه للعديد من منتجات العناية بالبشرة والشعر، وماركات الملابس. والتطبيقات المختلفة.
وتخطى متابعي حسابها الشخصي على موقع تبادل الصور والفيديوهات “إنستجرام” المليون متابع، كما تتصدر التريند بين الحين والآخر، بسبب صورها التذكارية مع زوجها فقط.
اقرأ أيضاً..آخرهم مصطفى كامل.. مشاهير احتفلوا بزفاف أبنائهم في 2021
