كتبت- أمل سعداوي
كشفت الفنانة بسمة أحمد، عن كواليس الأيام الأولى لأمومتها، مُشيرة إلى أنها رفضت أن ترضع ابنتها بشكل طبيعي لعدم وصفها بالبقرة:« أنا كنت بقول لهم أنا مش هرضع ولما سألوني ليه يا بسمة مش هترضعي، قلت لأن أنا مش بقرة وأنا مش همارس دور البقرة في حياة حد وأنا انتهيت إني أنا رضعت سنتين طبيعي وأول ما الموضوع مشي وعرفنا أنا وهي وبقى فيه إحساس الرضاعة قعدت سنتين أرضع».
الفنانة بسمة أحمد
وأضافت الفنانة خلال تصريحات تليفزيونية:«أول يومين تلاتة كانوا بيجروا ورايا بالبنت وبيقولي لي رضعيها وأنا أقول لا لا لا وأنا عارفة من أول لحظة إني حبيتها لكن مش عارفة أتعامل معاها ومش عارفة إيه دي وشوية شوية لما قعدنا لوحدنا ساعتها حصل».
وأكدت الفنانة على رفضها لوضع ابنتها الرضيعة بجوارها أثناء النوم:«مفيش هي عيل هينام جنبي أنا بتقلب ونومي تقيل ومش عايزة وجبت السرير وكنت عايزة من أول يوم رجعت من المستشفى إنها تقعد في السرير ده وفضلت سنين بننام جنب بعض والحقيقة أدين لأبوها بالفضل لأنها عملها تدريب النوم لأنها تنام لوحدها لأني معرفتش أعمل ده».
وعن حادث تعرضها للتحرش، قالت الفنانة، أنها تعرضت له بمنطقة التجمع الخامس منذ 12 عامًا: «تعرضت لحادثتين تحرش كبار في التجمع من حوالي 12 سنة ومبحبش أتكلم في تفاصيلها لأنها بتوجع، وأول مرة كان فيه ناس عدونا من وسط الناس لحد ما وصلنا مكان مقفول وتاني مرة كانت الحادثة الكبيرة وربنا خلى واحد ابن حلال يقف لي وعرف في الآخر يسلتني ويحطني في عربية ويجري بيا».
تابعت:« كان الحدث كبير لدرجة إن أنا في لحظة وقعت على الأرض وكان في فوق الـ100 رجل فوقيا وقولت أنا هموت والموضوع تعدى التحرش وأنا هموت».
استكملت حديثها: «مبحبش أقعد أفتكر كتير تفاصيل بس اللي ربنا اداهولي بعد كده إن حد حاول يمد إيده عليا فعرفت أمسك إيده وألطشه بالقلم فحسيت إن أنا عملت حاجة والواحد في اللحظات اللي زي دي بيبقى حاسس إنه قليل الحيلة ونفسه أي حد يساعده وينجده وأكتر إحساس بيقتل لما عينك تيجي في عين حد وانتي بتستغيثي وميعبركيش ودي قاسية جدًا».
إقرأ أيضًا: الفنانة بسمة بعد إصابتها بفيروس كورونا: «الحمد لله مفيش أعراض»
