كتبت: تقى أيمن
آثارت تصريحات الفنانة سماح أنور جدلاً واسعاً عبر مواقع التواصل الاجتماعي، بعد ظهورها في برنامج «كلام الناس»، وهي تتحدث عن كواليس من حياتها الشخصية، وسر ابتعادها عن الشاشة خلال الفترة الأخيرة.
سماح أنور: بقالي 17 سنة مابشربش مياه خالص
قالت سماح أنور، إنها امتنعت تماماً عن شرب المياه الطبيعية منذ 17 عاماً بسبب احتوائها على لون ورائحة، وتأثيرها بالسلب على صحتها.
وأشارت إلى أنها تقوم بتعويض هذا النقص بتناول الفاكهة والخضروات، وشرب المياه الغازية بدون سكر. أو تناول مشروبات ساخنة بشرط أن تقوم بغلي المياه للتخلص من أي ميكروبات.
أضافت «أنور»: «لما باخد بق ميّه جسمي بيضايق وبطني توجعني، وأنا بتجاوب مع جسمي وأشعر بما يؤلمه.. ولازم أوضح أنني لست طبيبة ولا متخصصة، وهذا نظامي الخاص وقد يكون شديد الضرر بالآخرين».
سماح أنور: باكل مرة واحده في اليوم طول حياتي
وقالت سماح أنور: « أنا باكل مرة واحدة في اليوم، طول حياتي، وباكل كل حاجة بيتزا ومكرونة، ما وقت ما خلصت المدرسة وابتديت أمثل.. إحنا بيجيلنا البريك مرة واحدة في الأوردر وإحنا بنشتغل من 12 لـ 18 ساعة.. فبناخد وجبة واحدة، وخلاص».
أضافت «أنور»: «أنا بشتغل من وأنا عندي 16 سنة فعلا، ودي كانت الفترة اللي كان شغلي فيها كتير أوي فيها.. فقعدت حوالي 15 سنة بشتغل كتير أوي، وده كان نظام حياتي».
وردت الفنانة سماح أنور، على اتهامها بالإفراط في التدخين. قائله: «أنا مبدخنش سجاير مصرى، وأكتر ناس بتدي نصائح مبيعملوش بيها وكدابين».
وأوضحت: «أنا مع التدخين ولكن بشرط ميكونش فيه ضرر كبير على الشخص». متابعة: «المجتمع منغلق انغلاق غير مسبوق لذلك لا يتقبلون فكرة التدخين».
«أنور»: الست لما تحب بتقع على وشها
وقالت «أنور»: «اتعودت أبقى لوحدي وبقى دا نظام حياتي ودي جنتي والحياة المثالية ليا، ومفيش راجل فيها ومش بدور على الحب.. والحياة العاطفية مش أولوية طول عمري لأني بقع في الحب وبتكون زي الحادثة».
أضافت: «حبيت مرة واحدة في حياتي ومكنتش لطيفة والست لما بتحب بتقع على وشها ودا بيطفش الرجالة، وأنا مش بعرف أتقل وأتحكم وبقعد باصه للتليفون مستنياه يتصل بيا.. وبالتالي اقتنعت إني لا أصلح للعلاقات العاطفية».
وأكدت الفنانة سماح أنور، أنها لم تقدم أي شخصية تمثلها بشكل شخصي طوال مسيرتها الفنية، ولا تنزعج من نقد أفلامها أو من سؤال الجمهور عن تشبهها بالرجال في أعمالها.
