بعد مهاجمة حلا شيحة لكليب «بحبك».. تامر حسني يرد «تقاضيتي مبلغ كبير ومثلتي ولا حد أجبرك؟»

كتبت: تقى أيمن

تصدرت الفنانة حلا شيحة، تريند جوجل خلال الساعات الماضية، بعدما نشرت على حسابها «انستجرام» حديث لها تُهاجم فيه الفنان تامر حسني بعد تجاهله لها.

وطرحه فيديو كليب «بحبك» من فيلم «مش أنا» والذي يتضمن مشاهد رومانسية تجمعه بها، رغم أنها أعلنت براءتها من العمل.

تعليق الفنانة حلا شيحة بعد نشر الفيديو

كتبت حلا شيحة على صفحتها الشخصية: “أنا اتفاجئت جدا بنزول كليب يجمع فيه مشاهد متفرقة من الفيلم وخصوصا بعد آخر بوست نزلته.

ووضحت فيه أنا إيه واتفاجئت أكتر خصوصا بعد وعد تامر حسني ليا وتأكيده أنه حیحترم رغبتي وبعض الطلبات اللي طلبتها منه بكل احترام وود الصيف اللي فات وأکدلي إنه هيحترم رغبتي”.

أضافت: “إحنا يمكن نجحنا بمقاييس الدنيا بس صدقوني بمقايیس ربنا احنا لم ولن ننجح.. أنا مش حتكسف من حد أنا تبت من المشاهد دي وهي لا تصح”.

تابعت:” وأنا غلطت وبصلح وأهم حاجة ان ربنا يرضى عني لان في الاخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا الفن لو بيخلينا نبعد عن منهج ربنا ومنبقاش قدوة لولادنا يبقي باطل و ميبقاش فن”.

ووجهت رسالة للفنان تامر حسني قائلة: “إحنا كلنا عندنا امتحان في الدنيا دي، وحابة أفكرك بالفيديو ده يا تامر اللي قلت فيه أنا مش بتمنى أموت، وأنا مطرب أنا دايما خايف من كده، كلام أكيد قلته في لحظة صدق جواك وجوانا كلنا”.

واختتمت حديثها قائلة: “كلنا بنغلط بس المهم في الآخر نتدارك الغلط ونصلح، {إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله، وجماله يا سلام لو أصواتنا ومواهبنا كلها نستعملها في الخير عشان يبقى فن بجد”.

رد الفنان تامر حسنى على حديث حلا شيحة

ورد تامر حسنى بعد تصريحات حلا شيحة على صفحته، قائلا: “للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً ونتناقش بيني و بينك، فا أنا مضطر أرد هنا برضو”.

تابع: ” أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد وأخلف .. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده”.

أضاف: “وبعدين الفيلم بقاله 3 اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا.

و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك”.

أختتم حديثه: “أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين”.

هجوم على تصريحات حلا شيحة

قال أحمد شيحة بعد تصريحات ابنته: “مفيش حاجة اسمها إن الفنان يعمل دور يكون قرأه، ومثله وبعدها يرجع يقول أنا مش عايز المشاهد دي، حتى لو كانت بنتي، وايه دخل تامر حسني إن هو يشيل ويحط”.

وعلقت الفنانة إلهام شاهين، قائله:” أن الفنانة حلا شيحة ليس لديها انتماء للفن، بدليل اعتزالها ثم عودتها ثم تصريحاتها الأخيرة، مضيفة: هي لديها نزعة دينية خاصة نحترمها، وهي حرة في تصرفاتها وتعمل ماتريده في حياتها، وفي المقابل عليها احترام الآخرين واحترام الوسط الفني طالما اعتزلته”.

ووجه المخرج محمد العدل رسالة للفنانة حلا شيحة على صفحته الرئيسية«فيسبوك»، قائلا: ” يا ريت بس لما تطلقي مترجعيش تقولي عايزة أمثل تاني يا أستاذة حلا”.

إقرأ أيضًا.. بالصور.. حلا شيحة تظهر بالحجاب مجددًا وسط دعم نجوم الفن