كتبت: أمل سعداوي
أكد الرئيس عبد الفتاح السيسي، أن المرأة المصرية شريك أساسي في النجاحات التي تشهدها البلاد، وأن يوم المرأة المصرية هو يوم عظيم، ويجب علينا أن نحتفل بالأم والأخت والابنة المرأة المصرية.
وأضاف الرئيس السيسي، خلال كلمته في احتفالية المرأة المصرية: “أود ان استهل حديثي اليوم بخالص التحية والتقدير إلى المراة المصرية العظيمة صانعة مجد الوطن.. والاساس المتين.. ومنبع الامل في المحن والشدائد.. فكل عام وأنتن عزة الوطن ومصدر قوته”.
استكمل الرئيس حديثه: ”مش قادر أقولكم يعنى لقاءي مع السيدات الفضليات الكريمات اللى التقيت بيهم في التكريم واللى مشوفتهومش وهما في كل بيت مصري نقولهم متشكرين ومقدرين بوجهلهم التحية والتقدير والاحترام”.
وتابع الرئيس: “اسمحولى أقولكم حتى السيدات اللى مش موجودين معانا دلوقتي وعند ربنا سبحانه وتعالى ندعو الله أن يتغمدهم برحمة بحق كل حاجة حلوة عملوها وكل سهرة وهدمة غسلوها وحق كل أكلة صنعوها وحق كل دعوة هما دعوها، ربنا يارب، هما ضيوف عندك وأكرمونا كلنا، وبقوا في دار الحق فتفضل عليهم بكرمك وعطفك ورحمتك.. يوم جميل أن احنا نتذكر الفضليات الكريمات العظيمات اللى هما نبع العطاء”.
الأم المثالية
وطالب الرئيس، من السيدات الموجودات في حفل تكريم المرأة المصرية والأم المثالية بعدم الغضب بسبب عدم إمكانية التصوير أو الحديث معه قائلا: “المكرمات كثيرات جدا.. ويمكن علشان مش عاوزين نقول يضيعوا الوقت ولا حاجة.. بس فيه اتنين من كبار القادة توفوا والجنازة النهاردة.. ومكنتش عاوز أعلن الخبر ده بعد الاحتفالية.. اتنين من قادة حرب أكتوبر.. الفريق عبد المنعم خليل.. والفريق عبد رب النبي حافظ.. الجنازة النهاردة.. مش تزعلوا”.
وأضاف:«نفسنا نكرم كل السيدات.. كل ست في بيتها بتقوم بجهد كبير اوي اوي.. اللى ينكره جاحد أو ظالم.. انا بتكلم مش زى ما الناس متصورة أننا منحازين.. بنحاول نبقي يعني يقولك.. منحازين.. لا لا.. بنتعامل مع الأمور بتوزان.. واللى بنعمله توازن.. مش انحياز.. مفيش انحياز توازن بس».
أكد الرئيس السيسي: “أنه من دواعي سروري وفخري أن أشهد بينكم اليوم الاحتفال السنوي بالمرأة المصرية العظيمة.. وسعادتي كبيرة وأن موجود بين عظيمات مصر في شتى المجالات.. الاحتفال بالمرأة المصرية أصبح تقليدا عزيزا ووسام شرف من الدولة لكل سيدة مصرية.. نعبر خلاله عن جزء يسير من احتراما لدورها الجليل، كشريكة في الكفاح والبناء والعمل”.
وأشار الرئيس، إلى أن المرأة كانت سببًا كبيرًا وأصيلًا لحالة النجاح اللى احنا بنعيشها ومكونتش ببالغ، خلال الأحداث اللى في العشر سنين اللى فاتت كانت المرأة محركة وصانعة للأحداث.
وأضاف: «لما جينا في برنامج الإصلاح الاقتصادى وبدعمها مررنا ظروف قاسية مرت على الوطن والشعب المصري كله بدعمها ومساندتها، ولولا هذا الدعم، الراجل موجود محدش يفهمني غلط ما أنا راجل برضه.. لكن افتكروا المرأة، افتكروا بإنصاف، أى زوج يفتكر بإنصاف زوجته بتعمل إيه؟، يتفكر كل ابن بإنصاف والدته بتعمل إيه ؟، هنجد أنها أعطت كثيرا جدا».
ويحرص الرئيس السيسي، على حضور الحفل كل عام تقديراً لدور المرأة المصرية، وتأكيداً منه دائماً على احترام المرأة المصرية التى تناضل فى كل ميادين الحياة.
إقرأ المزيد.. وزيرة التخطيط: المرأة المصرية تعيش أزهى عصورها في عهد الرئيس السيسي
