كتبت: أمل سعداوي
تصدر الفنان القدير عبد الرحمن أبو زهرة، تريند «جوجل»، خلال الساعات القليلة الماضية، بعد كشف أبناءه عن تطورات حالته الصحية.
حالة عبد الرحمن أبو زهرة الصحية
وقال الموسيقار أحمد أبو زهرة، ابن الفنان عبد الرحمن أبو زهرة، إن حالة والده الصحية غير مطمئنة ولا يوجد أي تحسن.
وأضاف خلال مداخلة هاتفية مع الإعلامى يوسف الحسينى، عبر برنامج التاسعة المذاع على القناة الأولى المصرية: «أخد بعض المحاليل لما راح المستشفى، وبدأ يتجاوب معانا واتكلمنا كلام بسيط، ولكن حاليا الحالة فى تدهور وربنا يشفيه، والموضوع مش واضح خالص من الحالة من الدكاترة».
وتابع أحمد: «لما نروح أنا وشقيقتى بنتكلم معاه، أقصى حاجة يهز رأسه لما نتكلم معاه».
كسر في الحوض
كما قالت الدكتورة منى عبدالرحمن أبوزهرة، ابنة الفنان، إن والدها سقط الأسبوع الماضي في المنزل، وبعدها نهض واستمر في المشي بشكل طبيعي:«الاسبوع إلى فات سقط سقطة بسيطة في البيت وقام ومشي عادي بعدها وكان كويس، لكنه بعد فحصه تأكد إصابته بكسر في الحوض، وبعد فحصه من قبل دكتور مخ وأعصاب قال عنده جفاف لان فعلًا فضل أسبوع رفض شرب المياه».
وأضافت: «الحالة تدهورت وتم نقل والدي للمستشفى ومش بيتناول الأكل لمدة 5 أيام، واضطرت المستشفى تركيب أجهزة ضخ للطعام، هو مش واعي أوي باللي حواليه، ومش متواصل معاهم كويس ومش بيتكلم مع اللي حواليه».
أكدت «منى»، أن من المفترض أن يخضع والدها لعملية جراحية لكن ما قد يكون عاىقًا هو عدم استقرار حالته: «المفروض فيه عمليه لكن حالته لسه مش مستقرة وممكن البنج يأثر عليه وبالتالي محتاج يتعافى شوية ويتناول الطعام عشان نحدد التدخل الجراحي هيكون إمتى».
وطالبت ابنة الفنان من الجمهور ومحبيه بالدعاء لوالدها: «ادعوله يقوم بالسلامة».
إقرأ المزيد.. آخر تطورات الحالة الصحية لـ عبد الرحمن أبو زهرة بعد إصابته بفيروس كورونا
