بيومي فؤاد في مرمى نيران أهل الفن بسبب “زواج اصطناعي “
كتبت- إسراء كامل
تفاعل العديد من الفنانين، مع تصريحات الفنان بيومي فؤاد الأخيرة عن الفنان محمد سلام بشأن اعتذاره عن مسرحية “زواج اصطناعي” قبل عرضها بأيام قليلة بموسم الرياض بالمملكة العربية السعودية.
مما أعرب كل فنان عن رأيه الخاص بشأن هذه التصريحات.. نستعرضها لكم في المقال التالي.
المخرجة كاملة أبو ذكري: الإحساس والفن نعمة
أعربت المخرجة كاملة أبو ذكري، عن رأيها بتصريحات بيومي فؤاد عن محمد سلام، عبر حسابها الشخصي على “فيسبوك”: “الأستاذ الفنان اللي كنت واحدة من محبيه، لو حضرتك فاكر إنك لما تعمل عمل اتحضر واتكتب واتنفذ في تلات أيام، وتروح تعرضه وترقص وتغني وتضحك وبعد كده تأخد آلاف الدولارات، لو ده بتسميه فن فأنا لا يشرفني إني أكون زميلة لك في هذه المهنة”.
وأضافت: “ولما تكون بتعرض التفاهات دي ده لا يشرف الفن المصري، ولما تعرض التفاهه دي وجارك بيدبحوا أطفاله ونساءه ورجاله وتقولي الفن، يبقي ماعنديش كلام أقدر أقوله غير إن الإحساس والفن نعمة إنتم آخر ناس تتكلموا عنها”.
الناقدة ماجدة خير الله: عليه العوض في الفن المصري
كتبت الناقدة الفنية ماجدة خير الله، عبر حسابها على فيسبوك: “الفنانين اللي كانوا مصفوفين خلف بيومي، رأيهم إيه في اللي عمله واللي قاله؟ لو حد منهم له موقف محترم ومختلف ليه ما يطلعش ويقول ان بيومي فؤاد لا يمثلني”.
وأضافت: “أما إذا كان كلهم موافقين على هذا الموقف المهين، يبقى عليه العوض في الفن المصري!”.
عمر حسن يوسف: أنت عامل 100 فيلم هابط
كما أعرب الفنان عمر حسن يوسف، عن رأيه، عبر حسابه الشخصي على “فيسبوك”: “فن إيه اللي بتقدمه.. ده أنت عامل بتاع ١٠٠ فيلم هابط و أخرهم اللي طلعت عملته على المسرح”.
وفاء عامر: الطرفان لم يخطئان
صرحت الفنانة وفاء عامر، ببرنامج “تفاصيل”: “الطرفان لم يخطئان.. بيومي فؤاد كان بيتكلم من منطلق تاني.. أنا مش هدافع عن الإتنين أنا هتكلم بشكل حيادي كل شخص ليه وجهة نظر، هل مصانع الأسحلة اللي بيقتلوا بيها فلسطين بمنتهى القسوة وقفت!؟.. هل الأرض بطلت تطرح!؟، ده اللي كان عاوز يقوله بيومي فؤاد ومحمد سلام”.
عفاف مصطفى: هو أنت ناقصك فلوس
نشرت الفنانة عفاف مصطفى، عبر حسابها على فيسبوك: “يا راجل طالع تعيط وتشحتف وأنت شافط كل الأدوار اللي في السوق مش عاتق ولا سايب فرصة لزملائك الأكفاء اللي مش لاقيين شغل وبيوتهم تعبانة.. بتبكي وتمثل على السعوديين كمان؟.. هو أنت ناقصك فلوس؟”.
تصريحات بيومي فؤاد المثيرة للجدل
أحدثت تصريحات الفنان بيومي فؤاد بموسم الرياض بالمملكة العربية السعودية، حالة من الجدل، “بنشكر دعمكم وبنشكر مساندتكم لأنور ولينا.. أنا فنان مصري وليا الشرف، اسمحولي أشكر معالي المستشار تركي آل الشيخ لوقوفه الدائم جانبنا، وأشكر الدكتور راكان وكل رجال صلة وعلى رأسهم صديقي عدنان الكيال، المسرحية إنتاج اتنين لسه مقبضوناش لحد دلوقتي محمد نصار وصلاح الجهيني، تأليف وإخراج عيل ولا له لازمة محمد محمدي”
مضيفا “جيت المملكة العربية السعودية وليا الشرف عشان نقدم فننا، مش جايين نضحك احنا جايين نقدم فننا، احنا بنحترمكم وانتم بتحترمونا، شيء عظيم إن الفنان يكون له جمهوره في كل الدول، شيء عظيم إني أخرج اتصور مع شاب سعودي أو سيدة سعودية وهي تعلم اني مصري أنا بشرف بلدي”.
قال بيومي فؤاد بخصوص إعتذار محمد سلام عن المسرحية “من حقك أنك تعتذر عن المسرحية لكن مش من حقك انك تغلط في فنك، إحنا مش بنيجي عشان نضحك إحنا بنقدم فننا المصري، انتوا بتحترمونا واحنا بنحترمكم جدا، أنا وكل زملائي بنحترمكم وبنحبكم وهنفضل طول عمرنا معاكم، كتر خيركم”.
مردفا بالقول “إحنا بنقدم فن.. بنتعب ونشقى عشان نقدم فن مش عشان نيجي نضحك، لو الموضوع كده يبقى فيه فنانين من أيام نجيب الريحاني لحد محمد أنور المفروض ينتحروا، احنا بنقدم فن تحياتي لحضراتكم أنا آسف”.
أضاف بيومي “أقسم بالله احنا مش بتوع فلوس والله العظيم مش بتوع فلوس، العرض ده لو قعد 15 يوم تاني بدون أجر، سيادة المستشار يعلم احنا يبقى لينا الشرف ونبقى فرحانين جدا، تحياتي لحضراتكم وأنا آسف، إحنا اتظلمنا واتهانا واحنا جايين نقدم فن”.
مسرحية زواج اصطناعي
تعد مسرحية “زواج اصطناعي” بطولة مي عز الدين، بيومي فؤاد، محمد أنور، وعدد كبير من الفنانين.
تدور أحداث مسرحية زواج اصطناعي، حول شخصية شروق وفاروق اللذين يتعرضان لأزمة في ليلة زفافهما، مما يدفعهما للجوء لخبير علاقات عاطفية، يجري لهما تجربة حديثة، بواسطة الذكاء الاصطناعي، تجعلهما يعيدان التفكير في مشروع زواجهما بالكامل.
نرشح لك: حرب غزة تشعل الخلافات بين انجلينا جولي ووالدها
