كتبت- أمل سعداوي
أثارت الفنانة شيرين عبد الوهاب الجدل من جديد على مواقع التواصل الاجتماعي، خاصة بعد تصريحاتها عن طليقها حسام حبيب وتطورات الأمور بينهم، حتى وصل الأمر للسخرية من الموسيقار الراحل حسن أبو السعود.
وقالت الفنان شرين عبد الوهاب: «حسام حبيب طلب 10% من أرباح شغلى.. أنا اتجوز قرد ومارجعش ليه تانى.. ومش عايز أعرف حد اسمه حسام تانى».
أضافت الفنانة: «أنا استاهل الضرب عشان طلعت قلت ما بيخدش منى فلوس.. أنا أسفة للناس عشان كدبت عليكوا، وهتعب عشان أرجع تانى شيرين اللى ضيعتها.. وعلاقتى بحسام عمرها ما كانت حب».
حمل السلاح
أكدت «عبد الوهاب»، أن زوجها السابق حمل السلاح في وجه بنتيها قائلة: «عيالى كانوا هيضربوا بالرصاص، قبلها بيومين قاعدين فى الأوضة، طلع من الدرج علبة فيها رصاص.. راح مدينى رصاصة وقال لى خد دى منى هدية».
وأضافت: «الحمد لله إنى لسه عايشة، وحسبى الله ونعم الوكيل.. احنا اطلقنا لما قصيت شعرى (بائن)، واللى حصل بعد ما هديت من الكارثة حسيت إن أنا مش قادرة استغنى عنه واديله فرصة تانية.. خناقات فيها ضرب وسحل على الأرض وشتيمة عمر ما إنسانة تقبلها على نفسها.. واتنيلت على عينى ورجعت فقولنا ندى فرصة تانى وشروط.. وبناتى فى بيت تانى ونشتغل.. لحد ما ابتدت الوعود تتلاشى والمشاكل ترجع تانى وقلة الأدب ترجع تاني».
تابعت الفنانة: «كل خناقة تحصل ما بينا يحرق دمي لحد ما امسك المكنة واحلق شعرى.. وطلعت غنيت عشان بناتى مايتعقدوش وحسستهم إنه (نيو لوك).. تخيلى قد إيه أنا تعبت، ومش بستعر من شكلى.. ولما رجعنا لبعض تانى رجعوا تانى البنات يشوفوا إنه بيتدخل فى كل شيء وإنسان معندهوش شغل».
«شرين» توجه نصائح للفتيات
ووجهت شرين عبد الوهاب عدة نصائح للفتيات قائلة: «بقول للناس حقكم عليا أنا آسفة..أكيد عندكم حاجات تاني أهم من جوازتي السودة دي».
أضافت: «أوعدكم أرجع شيرين اللي ضيعتها بالجوازة دي، بقول للبنات خليكم طيبين وقنوعين، ولبناتي آخر حاجة تفكروا فيها الجواز، هم عارفين مين مامتهم مكانوش عارفين يشموا نفسهم إلا لما مشي هو من البيت».
مصيدة فئران
وتابعت: «أنا غلطت في نفسي، لكن مش عيب إن الست المشهورة تكون متجوزة وبتحاول تحافظ على بيتها.. كنت فاكرة إني بحافظ على بيتي لكنه مكنش بيت، دي كانت مصيدة فئران.. أنا كنت عايشة عيشة الفار اللي دخل مصيدة فار علشان ياكل حتة جبنة لغاية ما يموت».
استكملت حديثها: «أنا مش فاضية له.. أنا بحضر أحلى أغاني وأحلى فيلم وفيه دنيا مستنياني، لكن لما أروح أتفسح أنا وولادي وألاقي العربية تتسرق وكمان أن اللي اتهدد إنه يتعملي محضر، فوق يابني بقى وأعرف إنت بتتكلم مع مين».
تابعت: «والد حسام حبيب كان المتحدث الرسمي لعلاقتنا، أنا لو كنت أدمنت الأدوية زي ما قالوا وتعبت وتخنت كان هيبقى بسبب حياتي معاه، أنا كنت زي البدر ولما عاشرته بقيت شبه حسن أبوالسعود».
أول رد من حسام حبيب
وعلق المطرب حسام حبيب على التصريحات التي أدلت بها زوجته السابقة. مؤكدًا أنه سيتخذ إجراءات قانونية ضدها.
قال «حبيب»: «أكيد هيكون في إجراء قانوني، عمري ما دافعت عن نفسي وعمري ما تكلمت طبعا كل ده كلام مرسل، الكلام اللي أنا هرد بيه كلام كله بوثائق، مش هقول كلام مرسل، كل حاجة دلوقتي بحضرها، حفاظا عليها وسمعتها، وعلى بيتها، مكنتش بتكلم».
أضاف: «بس أنا دلوقتي هضطر أني اتكلم، لأن الكلام بقى زيادة قوي، أنا كل اللي هعمله مش هطلع أتكلم كلام مرسل، أنا هطلع أتكلم كلام بحقايق وبوثائق، عشان أنا معرفش أقول كلام مرسل، لا أتحاسب عليه ولا افتري على حد، أنا هرد على كل حاجة هي قالتلها بوثائق تثبت إن الكلام ده كله تهديد، أنا بأبتز عشان خاطر اسمع الكلام ولو مسمعتش الكلام هيحصل فيا كده، بتهدد دايما بجمهورها أني هي هتعمل فيا كده، وهي فعلا بتحاول تعمل كده».
تابع: «بس أنا إجراءاتي القانونية، وردي في الإعلام هيبقى كله بوثائق وحقايق، علشان كده أنا مش مستعجل أنا بظبط دلوقتي كل حاجة قانونا وبمستندات».
التعليق الأول لأسرة حسن ابو السعود
وعلقت أسرة الملحن الراحل حسن أبو السعود، على تصريحات «شيرين» التي قالت فيها: « أنا كنت زي البدر ولما عاشرت حسام حبيب بقيت شبه حسن أبوالسعود».
وقالت أسرة الراحل: « في ميزان الإنسانية إيه قيمة الموهبة إذا اقترنت بالإساءة والأذى؟.. التنمر والسخرية من الناس عيب.. بس العار الحقيقي التنمر والسخرية من شخص ميت -ومش هقول شخص واكلين معاه عيش وملح وله فضل علينا.. لأن قليل الأصل ممكن يتناسى وينكر ده عادي- لأن الإساءة لشخص ميت مستوى أكثر انحداراً من الشر والدناءة».
وأضافت: «وقت الحساب.. المسيء هيقول لربنا إيه.. هيقوله لأ متحاسبنيش إني بتريق على ميت وبجرحه وبجرح محبيه وأسرته، أصل أنا موهوب أو مشهور أو غني؟ لأ متحاسبنيش أصل أنا أحسن فنان في الكون؟للأسف المسيء في ابتلاء شديد مش فاهم إنه عمال يحفر ويوسع في الحفرة لنفسه».
وتابعت : «للأسف الشر زايد وقلة الأصل زايدة وقلة الأدب مسكوت عنها، وكمان الأفاقين ماسكين راية دفاع مستديم عن الظلم والإيذاء. ميزان وبيتملي.. ربنا يجعل وجع قلبي ودعائي الليلة دي وليالي قبلها بسبب الإساءة المتكررة والحقد الظاهر في الطاقة والكلام من نصيب أي وكل مُسيء».
واختتم الأسرة حديثها: «كلمة أخيرة.. حسن أبو السعود الله يرحمه شكلاً كان قمر وشخصيا كان دمه سكر وطيب وكريم ومتواضع ومثقف وبيتكلم 3 لغات أجنبية بطلاقة ولبق وذوق.. فمش ممكن هتكوني شبهه في يوم من الأيام».
إقرأ المزيد.. حقيقة مرض «شيرين عبد الوهاب» بورم في الرحم
